Վանաձորի ուսումնական կենտրոնում (VTC) երկու ուսումնական դասընթաց է գործում դպրոցականների համար, շուտով կլինի երրորդը՝ սկսնակների համար։

ԵՐԵՎԱՆ, 6 հուլիսի – Sputnik. Հոկտեմբերին Վանաձորի տեխնոլոգիական կենտրոնում (VTC) ինֆորմատիկայի մեկամսյա դասընթաց կմեկնարկի զրոյական պատրաստվածություն ունեցող դպրոցականների համար։ Դիմումները կսկսեն ընդունել սեպտեմբերի կեսերից։

Ծրագիրը նախատեսված է 200 մասնակցի համար. սա առավելագույն թիվն է, որը կենտրոնը կարող է ընդունել՝ հաշվի առնելով ներկայիս կադրային ռեսուրսները։

Դասընթացը նախատեսված է սկսնակների համար։ Մեկ ամսվա ընթացքում նրանց կծանոթացնեն ինֆորմատիկայի հիմունքներին՝ ինչ է ալգորիթմը և ինչպես ստեղծել այն, ինչպես նաև կսովորեցնեն գրել պարզ ծրագրային կոդեր։ Կենտրոնն արդեն ունի երկու կրթական ծրագիր՝Yandex ծրագրավորման դպրոց (համեմատաբար ավելի խորացված դասընթացով) և ամառային դպրոց, որտեղ ամեն ամառ հաճախում է 10-ից 17 տարեկան երեխաներ։

VTC-ի կրթական և ինժեներական ծրագրերի ղեկավար Եղիշե Սաֆարյանը Sputnik Արմենիայի հետ զրույցում պատմեց, որ մասնակիցներին բաժանում են ըստ տարիքի և գիտելիքների մակարդակի։ Առաջին մակարդակը երեխաների համար նախատեսված «ուսուցողական» KodU-ն և Scratch-ն են։ Երկրորդ մակարդակում յուրացնում են վեբ ծրագրավորման հիմունքները HTML-ով և Clickteam Fusion-ով։ Երրորդ մակարդակը ներառում է Python լեզվի ուսուցում և ինժեներական նախագծման դասընթացներ։ Ավագ դպրոցի աշակերտները ավարտական նախագծեր են պատրաստում. նրանցից մի քանիսն արդեն մասնակցել են կենտրոնի կայքի նոր տարբերակի մշակմանը։

Այդ կայքում, որը շուտով հասանելի կլինի բոլորի համար, օժանդակ նյութեր են զետեղված դպրոցի ինֆորմատիկայի ուսուցիչների համար։ Բանն այն է, որ նոր դպրոցական ծրագրում այս առարկան վերանվանվել է «Համակարգչային գրագիտություն», և դրա համար նոր դասագրքեր են կազմվել։ Այս կապակցությամբ հեղինակները դիմել են Ձեռնարկությունների ինկուբատոր հիմնադրամին (որը կառավարում է VTC-ն)՝ հայերեն լեզվով օժանդակ նյութեր մշակելու խնդրանքով։

«Մենք պատրաստել ենք այդ նյութերը և տեղադրել կայքի նոր տարբերակում, որն արդեն հասանելի է ուսուցիչների համար», – նշեց Սաֆարյանը։

VTC–ի ամառային դպրոցն անցկացվում է արդեն մի քանի տարի և հայտնի է ոչ միայն Վանաձորում, այլև նրա սահմաններից դուրս։ Այստեղ իրենց երեխաներին բերում են նաև այն ընտանիքները, որոնք ամռանը այստեղ են գալիս իրենց հարազատների մոտ հանգստանալու, այդ թվում՝ արտասահմանից։ Մասնակիցներ կան նաև հարևան Շիրակի և Տավուշի մարզերից։