ԱՄՆ նախագահ Դոնալդ Թրամփը հայտարարել է, որ Վաշինգտոնը կարող է օգտագործել առևտրային լիցենզիաները՝ պատասխան քայլեր ձեռնարկելու այն երկրների դեմ, որոնք, նրա խոսքով, տասնամյակներ շարունակ «խաբել են» Միացյալ Նահանգներին։ Truth Social հարթակում հրապարակված գրառման մեջ Թրամփը նշել է, որ կարող է կիրառել «լուրջ և կոշտ միջոցներ» նման պետությունների նկատմամբ։

Նրա խոսքով՝ նման լիազորություններով իրեն «պատահաբար» օժտել է ԱՄՆ Գերագույն դատարանը։ Թրամփը հավելել է, որ Վաշինգտոնը ունի գործիքակազմ՝ արտաքին առևտրային քաղաքականության շրջանակում պատասխան քայլեր ձեռնարկելու համար։

Հայտարարությունը հնչել է այն բանից հետո, երբ փետրվարի 20-ին ԱՄՆ Գերագույն դատարանը անօրինական էր ճանաչել Թրամփի վարչակազմի սահմանած մի շարք լայնածավալ ներմուծման մաքսատուրքեր։ Դատավորներից վեցը եզրակացրել էին, որ նախագահը գերազանցել է իր լիազորությունները՝ առանց Կոնգրեսի համաձայնության սահմանելով այդ տուրքերը։