Քաղաքական ուժերը շարունակում են քարոզարշավը. ընտրություններին մնաց մեկ շաբաթ
Ընտրություններ 2026
Քաղաքական ուժերը շարունակում են քարոզարշավը. ընտրություններին մնաց մեկ շաբաթ
Իշխող «Քաղաքացիական պայմանագրի» նախընտրական քարոզարշավի հերթական օրվա ընթացքում թերևս ամենաշատն առանձնացան ոչ թե Երևանում ՝ վարչապետի մասնակցությամբ հանդիպումները, այլ Արագածոտնի մարզում կուսակցական միջոցառումները: «Հրապարակ»-ը մի ձայնագրություն հրապարակեց, որում Բյուրականի դպրոցի տնօրենի պաշտոնակատարն ուսուցիչներին հորդորում էր հավաքվել գյուղապետարանի դիմաց. նա չի հերքել, որ իր ձայնն է.
«Կխնդրեի, որ դուք բոլորով ներկա լինեք՝ ընդունելու մեր պարոն մարզպետին և իր թիմակիցներին, լինելու են նաև շատ հյուրեր, հարգելի ուսուցիչներ, խնդրում եմ, որ դուք նույնպես ներկա լինեք, լինելու է նաև համերգային ծրագիր»:
Տնօրենի պաշտոնակատար Վարսենիկ Վարդանյանն ավելի ուշ տեղում հարցազրույց տվեց News.am-ին ու չթաքցրեց՝ ինքն ու ուսուցիչները եկել են «Քաղաքացիական պայմանագրի» քարոզարշավին. - «Ես ուսուցիչներին ընդամենը որպես լիազոր մարմնի ներկայացուցիչ հրավիրել եմ, որ գան այստեղ, անընդհատ հարցեր են լինում, որպեսզի մարզպետին հանդիպեն և իրենց ունեցած հարցերը փոխանցեն մարզպետին, դրա համար հրավիրել եմ, որ ուսուցիչները ներկա գտնվեն»:
«Ես ուղղակի աջակից եմ, սիրով մասնակցում եմ, խնդրում եմ՝ ոչ մի սադրանք», - ասում էր ներկաներից մեկը:
Նիկոլ Փաշինյանն իր մի շարք ենթակաների, կուսակցականների, այդ թվում նաև Երևանի քաղաքապետարանի պաշտոնյաների հետ շրջում էր մայրաքաղաքի Նորք-Մարաշ և Քանաքեռ-Զեյթուն վարչական շրջաններում.
Փաշինյանն այսօր բանավեճերի մեջ չմտավ. քարոզարշավն անցավ արդեն սովորական ձևով՝ քայլերթ, սելֆիներ, սրտիկներ ու երգ ու պար և ճոխ սեղան՝ զուռնա-դհոլի ու ակորդեոնի նվագակցությամբ:
Երեկոյան Փաշինյանը հարթակ բարձրացավ ու դարձյալ խոսեց TRIPP նախագծի, այդ թվում՝ էներգակիրների տարանցման մասին:
«Սխալվելու լիմիտն իրենք վաղուց սպառել են». - երկրորդ նախագահ Ռոբերտ Քոչարյանի առաջնորդած «Հայաստան» դաշինքը Երևանի Ազատության հրապարակում հանրահավաք անցկացրեց:
Քոչարյանի ելույթի զգալի մասը վերջին շաբաթներին Մոսկվայից հնչող սպառնալիքներին էր վերաբերում: Նրա գնահատմամբ՝ Երևանին վերջնագիր են ներկայացրել, և եթե Փաշինյանի իշխանությունը վերընտրվի, տնտեսական խորը ճգնաժամ կհետևի. - «Հավատացեք ինձ, ես գիտեմ ինչ եմ ասում, և հանուն ինչի՞ այս ամենը՝ հանուն նրա, որ մեկ մարդ ուզում է անպայման պահել իր աթոռը, սոսնձել ... »:
ԵԱՏՄ-ում մնալուն կողմնակից գործարար Գագիկ Ծառուկյանը Լոռիում էր: «Բարգավաճ Հայաստան»-ի առաջին համարը Քոչարյանի նման շարունակում է քննադատել իշխանությունների արտաքին քաղաքականությունն ու ահազանգել՝ Ռուսաստանի քայլերը կարող են էապես վնասել Հայաստանի տնտեսությունը. -
«Էսօր ճանապարհները փակ ա, մարդիկ վարկ են վերցրել, աշխատավարձ չեն կարողանալու տալ»:
Ռուսաստանաբնակ միլիարդատեր Սամվել Կարապետյանի առաջնորդած «Ուժեղ Հայաստան»-ը շարունակեց քարոզարշավը Շիրակի մարզում:
«Ու Շիրակի մարզի ամենախոշոր միավորումը՝ Ախուրյանը չունի զարգացման ծրագիր, չգիտեն մարդիկ՝ ինչպես է լինելու երկու տարի հետո, ինչա այստեղ կառուցվելու», - ասում էր դաշինքի առաջին համար Նարեկ Կարապետյանը:
Նա դարձյալ աշխատատեղեր էր խոստանում. - «Մեր ծրագրի հիմնական մասը՝ Շիրակի մարզին ապահովել աշխատատեղերով, Շիրակի մարզի տղամարդիկ պետք է գործ ունենան, որ խոպան չգնան, կանայք պետք է գործ ունենան, որ իրենց համար ճիշտ զարգացնեն իրենց կարիերան, ընտանիքը կարողանան ճիշտ պահեն, լավ պահեն»:
Շիրակում էր նաև «Լուսավոր Հայաստան»-ը: Ցուցակի առաջին համար Էդմոն Մարուքյանն ասում է, թե նախընտրում են լրատվամիջոցների ու սոցցանցերի միջոցով իրենց ասելիքը փոխանցել մարդկանց, այսօր փորձեցին որքան հնարավոր է մեծ թվով գյումրեցիների հետ շփվել: «Լուսավոր»-ի ղեկավարն ընդգծում է՝ կարևոր է, որ ոչ մի ուժ խորհրդարանում բացարձակ մեծամասնություն չունենա:
«Մենք ժողովրդին կոչ ենք անում ընտրությունների միջոցով այնպես քվեարկությունը կազմակերպի, որ Հայաստանում այլևս բացարձակ իշխանություն չունենան, մենք տեսել ենք բացարձակ իշխանություն մինչև 2018 թվականը», - հայտարարում էր Մարուքյանը:
Խորհրդարանական ընտրություններին մնաց ուղիղ 7 օր: