Պատերազմը, Wildberries-ը և «հազար կտրվածքների» մարտավարությունը
Երկու շաբաթվա ընթացքում Ուկրաինայի զինված ուժերը Ռուսաստանի տարածքում 18 անգամ հարձակվել են Wildberries-ի լոգիստիկ կենտրոնների վրա, որոնց ընդհանուր մակերեսը գերազանցում է 1 միլիոն քառակուսի մետրը։ Դա կազմում է ընկերության խոշորագույն պահեստների ընդհանուր մակերեսի շուրջ 40 տոկոսը։ Wildberries-ի 26 խոշորագույն պահեստներից 10-ն արդեն վնասվել են։ Այս տվյալները ներկայացրել է ռուսական «Ագենտստվո» պարբերականը՝ հղում անելով սեփական ուսումնասիրությանը։
Ամբողջությամբ ոչնչացված օբյեկտների թվում են Մոսկվայի մարզում գտնվող խոշորագույն կենտրոնը՝ 250 հազար քառակուսի մետր մակերեսով, ևս մեկ խոշոր հանգույց՝ 170 հազար քառակուսի մետր մակերեսով, ինչպես նաև պահեստներ Տամբովի մարզում, Կրասնոդարում, Նևիննոմիսկում, Սանկտ Պետերբուրգում և Ռուսաստանի այլ շրջաններում։ Հատկանշական է, որ որոշ օբյեկտներ հարձակման են ենթարկվել մի քանի անգամ։
Ուկրաինացի քաղաքագետ Օլեգ Լիսնին իր վերջին տված հարցազրույցում բացատրել է, թե ինչու են Ուկրաինայի զինված ուժերը Wildberries-ը դարձրել առաջնահերթ թիրախներից մեկը։
Հայելային պատասխանի ռազմավարություն
Փորձագետի խոսքով՝ հարվածները միաժամանակ մի քանի ռազմավարական խնդիր են լուծում։ Առաջին հերթին՝ պատերազմը տեղափոխվում է Ռուսաստանի տարածք, որտեղ միլիոնավոր քաղաքացիներ սկսում են զգալ հակամարտության նյութական և բարոյական հետևանքները։
«Մոսկվայում կարծում էին, որ կարող են անպատիժ ռմբակոծել ուկրաինական քաղաքները, հիվանդանոցները, ծննդատները և պահեստները։ Սակայն միակողմանի խաղ չստացվեց։ Ուկրաինան հարվածները տեղափոխում է Ռուսաստանի ցավոտ կետերին»,— ասել է նա։
Եթե նախկինում առաջնահերթ թիրախները նավթավերամշակման գործարաններն էին, ապա այժմ ուշադրությունը տեղափոխվել է լոգիստիկ կենտրոնների վրա։ Քաղաքագետն ընդգծում է, որ Wildberries-ը միայն հագուստ և աքսեսուարներ չէ, այլ նաև երկակի նշանակության ապրանքներ՝ զրահաբաճկոններ, սաղավարտներ և անօդաչու թռչող սարքերի բաղադրիչներ։
Բացի այդ, նրա խոսքով, ընկերությունը սերտորեն կապված է Կրեմլի մերձավոր շրջապատի հետ, որը մենաշնորհել է Ռուսաստանի մանրածախ առևտուրը։
Հարված տնտեսությանը և լոգիստիկային
Երկրորդ՝ հարձակումները լուրջ վնաս են հասցնում լոգիստիկ ենթակառուցվածքներին։ Ճգնաժամը վերաբերում է ոչ միայն առևտրային հարթակին, այլև ամբողջ ռուսական մանրածախ առևտրին։
Wildberries-ին և Ozon-ին բաժին է ընկնում Ռուսաստանում առցանց պատվերների մինչև 80 տոկոսը, իսկ այդ հարթակներում աշխատում է ավելի քան 1,2 միլիոն վաճառող։
Նախնական գնահատականներով՝ վնասները կազմում են 1,9-ից մինչև 3 միլիարդ դոլար։ Wildberries-ը հարձակումները որակել է որպես անհաղթահարելի ուժի հանգամանք և մատակարարներին առաջարկել է միայն մասնակի փոխհատուցում։
Արդյունքում տասնյակ հազարավոր փոքր ձեռնարկատերեր, որոնք պատշաճ ապահովագրություն չեն ունեցել, կորցրել են իրենց ամբողջ ապրանքը։ Դա կարող է հանգեցնել ոլորտում զանգվածային սնանկությունների։
Ապրանքաշրջանառության նվազումը և ձեռնարկությունների փակվելն արդեն հանգեցնում են հարկային մուտքերի կրճատման՝ ստիպելով տարածաշրջանային իշխանություններին քննարկել շտապ վարկավորման ծրագրեր։
Ընկերության հիմնադիր Տատյանա Կիմը նախօրեին հայտարարել էր․
«Մենք երկրի կառավարության հետ քննարկել ենք բոլոր տուժած ձեռնարկատերերին աջակցելու համալիր միջոցառումներ։ Ներկայում մշակվում է ընդհանուր համակարգ, որի շրջանակում օգնություն կստանա յուրաքանչյուրը»։
Ֆինանսական ռիսկերը և «միլիարդի խնդիրը»
Լիսնիի խոսքով՝ Ռուսաստանի իշխանությունները ծրագրում էին Wildberries-ը վերածել համաշխարհային առևտրային հարթակի, ինչի պատճառով պետական բանկերը առատորեն վարկավորում էին ընկերությանը։
Այժմ հարց է առաջանում՝ ո՞վ է մարելու այդ պարտքերը։
«Ամենայն հավանականությամբ, հիմնական կապիտալը դուրս է բերվել արտասահման, իսկ ընկերությունը ենթակառուցվածքները վերականգնելու միջոցներ չունի»,— կարծում է Լիսնին։
Բանկային ոլորտում հայտնի ասացվածք կա․ եթե դու բանկին պարտք ես մեկ միլիոն, դա քո խնդիրն է, իսկ եթե պարտք ես մեկ միլիարդ, դա արդեն բանկի խնդիրն է։
Հաշվի առնելով, որ Wildberries-ը ռուսական վարկային կազմակերպություններին պարտք է միլիարդավոր ռուբլիներ, իսկ լոգիստիկ շղթաները խզվել են, իրավիճակը լուրջ մարտահրավեր է դառնում Ռուսաստանի ամբողջ ֆինանսական համակարգի համար։
Լոգիստիկ շղթաների բարդացումը հանգեցրել է գների աճի՝ ստիպելով ռուսական իշխանություններին շտապ կարգով պահեստային տարածքներ որոնել Ղազախստանում և Բելառուսում։
Փորձագետի խոսքով՝ Ռուսաստանի ներսում պահեստային տարածքների սեփականատերերը գնալով ավելի հաճախ են հրաժարվում համագործակցել առևտրային հարթակների հետ՝ վախենալով ուկրաինական անօդաչու սարքերի հարվածներից։
Այս պահին ընկերությանը մնացել է շուրջ 200 օբյեկտ։ Քաղաքագետը նշում է, որ ևս 12 առանցքային հանգույցի ոչնչացումը կարող է հանգեցնել ամբողջ լոգիստիկ համակարգի փլուզման։
Այդ պատճառով, նրա գնահատմամբ, Ուկրաինայի անօդաչու համակարգերի ուժերը կենտրոնանալու են հենց այդ «ցավոտ կետերի» վրա։
Լիսնին Wildberries-ի դեմ հարձակումները բնութագրում է որպես «հազար կտրվածքների մարտավարություն»։ Խոսքը մեկ խոշոր ճակատամարտի փոխարեն հակառակորդին շարունակական և ճշգրիտ հարվածների ենթարկելու մասին է։
Նավթային ենթակառուցվածքների դեմ հարձակումների հետ միասին դա սպառում է Մոսկվայի ռեսուրսները՝ շղթայական արձագանք առաջացնելով սոցիալական, բանկային, տնտեսական և այլ ոլորտներում։
Փորձագետը կարծում է, որ Ռուսաստանը կարող էր կանգնեցնել այս գործընթացը՝ համաձայնելով «երկնքում հրադադարի», սակայն, հաշվի առնելով Վլադիմիր Պուտինի բնավորությունը, նման քայլ ակնկալել պետք չէ։ Փոխադարձ հարվածներն անօդաչու սարքերով և հրթիռներով, ամենայն հավանականությամբ, կշարունակվեն։
ՄԵԿՆԱԲԱՆՈՒԹՅՈՒՆՆԵՐ
0