Փաշինյանը հանդիպել է Փեզեշքիանի հետ, մասնակցել Խամենեիի հրաժեշտի արարողությանը
Վարչապետ Նիկոլ Փաշինյանը Թեհրանում հանդիպել է Իրանի նախագահ Մասուդ Փեզեշքիանի հետ։
ՀՀ կառավարության լրատվականի փոխանցմամբ՝ վարչապետը ևս մեկ անգամ իր ցավակցությունն է հայտնել Իսլամական Հանրապետության գերագույն առաջնորդ Ալի Խամենեիի մահվան կապակցությամբ՝ ընդգծելով, որ Հայաստանը կիսում է Իրանի ժողովրդի վիշտը։
Փեզեշքիանը շնորհակալություն է հայտնել վարչապետ Փաշինյանին Խամենեիի հրաժեշտի պաշտոնական արարողությանը մասնակցելու նպատակով Թեհրան ժամանելու համար։ Նա նշել է, որ իր երկիրը բարձր է գնահատում դժվարին իրավիճակում Իրանի նկատմամբ Հայաստանի կառավարության որդեգրած դիրքորոշումը և ցուցաբերած մարդասիրական աջակցությունը։
Իրանի նախագահը շնորհավորել է Նիկոլ Փաշինյանին խորհրդարանական ընտրություններում հաղթանակի առիթով և համոզմունք հայտնել, որ երկկողմ հարաբերությունները կշարունակեն հետևողականորեն զարգանալ ու ամրապնդվել։
Կողմերը մտքեր են փոխանակել նաև տարածաշրջանային նշանակության հարցերի շուրջ՝ կարևորելով խաղաղության, կայունության և տարածաշրջանային համագործակցության ամրապնդմանն ուղղված հետևողական քայլերի իրականացումը, ասված է հաղորդագրությունում:
Իրանական IRNA լրատվական գործակալության փոխանցմամբ՝ Փեզեշքիանն ընդգծել է երկու երկրների միջև հարաբերությունները «արտաքին միջամտությունից պաշտպանելու» անհրաժեշտությունը, հավելելով, որ Թեհրանի և Երևանի միջև բարեկամական կապերի պետք է զարգանան փոխադարձ կամքի հիման վրա՝ «արտաքին դերակատարներից անկախ»:
Իրանական կողմը հաղորդում է նաև, որ Փաշինյանը վերահաստատել է երկու երկրների միջր բարեկամական հարաբերությունները, ընդգծելով` Հայաստանը հետևողական է, որ իր գործողությունները երբեք չվտանգեն Իրանի շահերը:
Հայաստանի վարչապետն այսօր Թեհրանի Մոսալլա մզկիթում մասնակցել է Իրանի հանգուցյալ գերագույն առաջնորդի հրաժեշտի պաշտոնական արարողությանը:
Կառավարության լրատվականի փոխանցմամբ՝ Նիկոլ Փաշինյանն իր ցավակցություններն է փոխանցել Իրանի նախագահին և փոխնախագահին, Ալի Խամենեիի ընտանիքի անդամներին:
Հրաժեշտի արարողության ընթացքում վարչապետը հարգանքի տուրք է մատուցել Ալի Խամենեիի հիշատակին և գրառում կատարել սգո մատյանում: