Սերժ Սարգսյանին նոր մեղադրանք է առաջադրվել առանձնապես խոշոր չափերով կաշառք ստանալու համար

ՀՀ երրորդ նախագահ Սերժ Սարգսյանին նոր մեղադրանք է առաջադրվել՝ առանձնապես խոշոր չափերով կաշառք ստանալու հոդվածով։ Այդ մասին տեղեկացրել են ՀՀ գլխավոր դատախազությունից։

Ըստ դատախազության՝ հանրային քրեական հետապնդումը հարուցվել է ՀՀ Քրեական օրենսգրքի 311-րդ հոդվածի 4-րդ մասի 2-րդ կետով, որը համապատասխան է գործող օրենսգրքի 435-րդ հոդվածի 3-րդ մասի 3-րդ կետին։ Նշված հոդվածով նախատեսվում է 7–12 տարվա ազատազրկում։

Հանրապետական կուսակցության փոխնախագահ Արմեն Աշոտյանը ավելի վաղ հայտնել էր, որ Սերժ Սարգսյանին կրկին կանչել են Հակակոռուպցիոն կոմիտե և նրա նկատմամբ կիրառվել է երկիրը լքելու արգելք։ Աշոտյանի խոսքով՝ իշխանությունն այս քայլին դիմել է այն բանից հետո, երբ դատարանը նոյեմբերի 5-ին երկու անգամ մերժել է Սարգսյանի նկատմամբ բացակայելու արգելք կիրառելու միջնորդությունը։

Հիշեցնենք, որ ՀՀ երրորդ նախագահին առնչվող չորս քրեական գործերը քննվում են երկու վարույթում։

Այսպես կոչված «Դիզելի գործը» միացվել է այն վարույթին, որտեղ շոշափվում են նաև ՀՀ երկրորդ նախագահ Ռոբերտ Քոչարյանի որդու՝ Սեդրակ Քոչարյանի, ինչպես նաև նախկին խոշոր գործարար Միխայիլ Բաղդասարովի անունները։

Իսկ գործարար Սիլվա Համբարձումյանից կաշառք վերցնելու և Իսակովի պողոտայի հողերի օտարման գործերը միացվել են մեկ այլ վարույթի։