Մոջթաբա Խամենեին թույլատրել է իրանական թիմին բանակցել ԱՄՆ-ի հետ․ Axios
Իրանական պատվիրակությունը ստացել է գերագույն առաջնորդ Մոջթաբա Խամենեիի համաձայնությունը՝ ԱՄՆ-ի հետ բանակցություններին մասնակցելու համար։ Ինչպես փոխանցում է Վեդոմոստի-ն, այս մասին գրում է Axios-ը՝ հղում անելով իր աղբյուրներին։
«Իրանական թիմը սպասում էր գերագույն առաջնորդի թույլտվությանը։ Ըստ աղբյուրի՝ այն ստացվել է երկուշաբթի երեկոյան», – ասվում է նյութում։
Զրուցակիցներից մեկի խոսքով՝ իրանական կողմը ձգձգում էր բանակցությունները բանակցողների վրա Իսլամական հեղափոխության պահապանների կորպուսի կողմից գործադրվող «ակնհայտ ճնշման» պատճառով։ Հանդիպման ամսաթվի հետաձգման նպատակը «ավելի կոշտ դիրքորոշման» հասնելն է. «Ոչ մի բանակցություն մինչև ամերիկյան շրջափակման դադարեցումը»։
Պարբերականի տվյալներով՝ փոխնախագահ Ջեյ Դի Վենսը ապրիլի 21-ի առավոտյան կմեկնի Իսլամաբադ՝ Իրանի հետ պատերազմի ավարտի հնարավոր համաձայնագրի շուրջ բանակցություններ վարելու համար։
Ապրիլի 20-ին ԱՄՆ նախագահ Դոնալդ Թրամփը հայտնել էր, որ Վենսը և նախագահի հատուկ բանագնաց Սթիվ Ուիթքոֆը մեկնել են Իսլամաբադ՝ Իրանի հետ բանակցությունների նոր փուլը նախապատրաստելու համար։ Թրամփը հերքել է Իրանի հայտարարություններն այն մասին, թե հնարավոր է հրաժարվեն բանակցություններին մասնակցելուց։
The Wall Street Journal-ը գրել էր, որ Իրանը նույնպես բանակցային խումբ կուղարկի Իսլամաբադ։