Ավելի քան 200 մարդ զոհվել է Կոնգոյի Դեմոկրատական Հանրապետության արեւելքում հանքի փլուզման ժամանակ, տեղեկացրել է BBC News-ը՝ հղում կատարելով տեղի իշխանություններին։

Ինչպես լրագրողներին ասել է Հյուսիսային Քիվուի նահանգապետ Լումումբա Կամբերե Մույիսան, Ռուբայա քաղաքի հանքը փլուզվել է չորեքշաբթի տեղատարափ անձրեւների պատճառով։

Այդ ժամանակ զոհվածների թիվն անհայտ էր։ Կոլտանի (հանքանյութ, որն օգտագործվում է էլեկտրոնիկա՝ սմարթֆոններ եւ համակարգիչներ արտադրելու համար) հանքարդյունաբերությամբ զբաղվողների թվում եղել են կանայք եւ երեխաներ։

Հանքի նախկին պետը հեռուստաընկերությանն ասել է, որ տարածքը վատ էր պահպանվում, ինչը մեծացնում էր վթարների ռիսկը եւ բարդացնում փրկարարական աշխատանքները։ Նա ավելացրել է, որ գրունտի փխրունությունը սրել է իրավիճակը։

Փլուզման հետեւանքով զոհվածների մեջ կան կանայք, երեխաներ եւ չգրանցված հանքափորներ, որոնք պաշտոնապես չէին աշխատում հանքարդյունաբերական ընկերություններում։

Ըստ տեղեկությունների՝ մոտ 20 փրկվածներ բուժվում են հիվանդանոցներում։