Իսրայելը ՀԱՄԱՍ-ին սպառնում է ավիահարվածների «հզոր փոթորիկով»

Իսրայելը հայտարարել է, որ Գազայի վրա ավիահարվածների «հզոր փոթորիկ» կտեղա որպես ՀԱՄԱՍ-ին ուղղված վերջին նախազգուշացում այն մասին, որ անկլավը կոչնչացվի, եթե զինյալները չընդունեն ԱՄՆ նախագահ Դոնալդ Թրամփի պահանջը՝ ազատ արձակել բոլոր պատանդներին և հանձնվել․ գրում է Reuters-ը։

Բնակիչները պատմել են, որ իսրայելական ուժերը ռմբակոծել են Գազա քաղաքը և պայթեցրել փողոցներում գտնվող զրահապատ մեքենաները: ՀԱՄԱՍ-ը հայտարարել է, որ ուսումնասիրում է հրադադարի հաստատման վերաբերյալ ԱՄՆ-ի վերջին առաջարկը, որը ներկայացվել էր կիրակի՝ Թրամփի նախազգուշացմամբ, որ դա զինյալ խմբավորման «վերջին հնարավորությունն» է:

«Այսօր հզոր փոթորիկ կտեղա Գազա քաղաքի երկնքում», – X-ում գրել է Իսրայելի պաշտպանության նախարար Իսրայել Կացն ու հավելել, որ սա վերջին նախազգուշացումն է ՀԱՄԱՍ-ի «մարդասպաններին», որոնք գտնվում են Գազայում և արտասահմանյան շքեղ հյուրանոցներում։

«Ազատ արձակե՛ք պատանդներին և վայր դրե՛ք ձեր զենքերը, հակառակ դեպքում Գազան կոչնչացվի, դուք կոչնչացվեք»,- գրել է Կացը։

Իսրայելցի բարձրաստիճան պաշտոնյայի խոսքով՝ Գազայի վերաբերյալ ԱՄՆ վերջին առաջարկը պահանջում է, որ ՀԱՄԱՍ-ը հրադադարի առաջին օրը վերադարձնի մնացած բոլոր 48 կենդանի և մահացած պատանդներին։