Փետրվարի 28-ի գիշերը դարձավ ԱՄՆ-ի և Իրանի միջև ողջ դիմակայության պատմության ամենալուրջ ռազմական բախումը, որը ներգրավեց գրեթե ամբողջ Պարսից ծոցը։

Իսրայելն ու ԱՄՆ-ն առաջինը հասցրին զանգվածային հարվածներ Իրանի տասնյակ ռազմական օբյեկտների ուղղությամբ՝ հայտարարելով, որ թիրախում են հրթիռային և միջուկային ենթակառուցվածքները և Թեհրանի կողմից ներկայացվող «էքզիստենցիալ սպառնալիքը»։

Իսրայելի պաշտպանության բանակը (ՑԱՀԱԼ) հաստատեց, որ գործողությունը մի քանի ամիս պլանավորվել է Պենտագոնի հետ սերտ համագործակցությամբ՝ ընդգծելով երկու բանակների գործողությունների «առավելագույն սինխրոնացումը»։

Թեհրանը անմիջապես անցավ պատասխան հրթիռային հարվածների՝ Պարսից ծոցի երկրներում տեղակայված ամերիկյան օբյեկտների դեմ։ Հարվածների տակ են հայտնվել՝

▪️ ԱՄՆ ռազմածովային ուժերի Հինգերորդ նավատորմի սպասարկման կենտրոնը Բահրեյնում

▪️ Ալ-Ուդեյդ ավիաբազան Քաթարում

▪️ Ալի-Սալեմ ավիաբազան Քուվեյթում

▪️ Ալ-Դաֆրա ավիաբազան ԱՄԷ-ում

▪️ ԱՄՆ օբյեկտները Հորդանանում և Իրաքյան Քրդստանում

▪️ ԱՄՆ բազաները Սաուդյան Արաբիայում

Իրանի Իսլամական հեղափոխության պահապանների կորպուսը (ԻՀՊԿ) հայտարարեց Պարսից ծոցում տեղակայված ամերիկյան ուժերի ուղղությամբ բալիստիկ հրթիռների արձակման և «Իսկական խոստում 4» վրեժի գործողության մեկնարկի մասին։ Զուգահեռաբար Իսրայելի տարածքի ուղղությամբ արձակվել է շուրջ երեք տասնյակ հրթիռ։

Ալ-Ուդեյդի, Ալ-Դաֆրայի և Հինգերորդ նավատորմի բազայի ուղղությամբ խիտ հրթիռային հարվածը հարված է ԱՄՆ-ի՝ որպես Ծոցի միապետությունների անվերապահ անվտանգության երաշխավորի կերպարին։

Այժմ Վաշինգտոնը կամ կգնա էսկալացիայի՝ ռիսկի ենթարկելով երկարատև հակամարտության մեջ ներքաշվելը, կամ կսահմանափակվի «պատժիչ ցուցադրությամբ» և մի քանի օր ինտենսիվ հարվածների փոխանակումից հետո կանցնի բանակցությունների։ Հանրային դաշտում դա կներկայացվի որպես «իրանական սպառնալիքի հաջող զսպում» ԱՄՆ-ի կողմից և «ագրեսորի հաջող պատժում» Իրանի կողմից։

Ամենաքիչ հավանական, սակայն ամենավտանգավոր սցենարը՝ ամերիկյան կամ իսրայելական անձնակազմի խոշոր կորուստներ, հարված խորհրդանշական նշանակություն ունեցող օբյեկտի, ինչը փաստացի կբացի լայնամասշտաբ պատերազմի ճանապարհը։

Վաշինգտոնն ու Թել-Ավիվը հայտարարում են, որ պատրաստ են նաև այդ սցենարին։ «Այս գործողությունը կշարունակվի այնքան, որքան անհրաժեշտ է։ 47 տարի շարունակ իրանական ռեժիմը կոչ է արել Իսրայելի և Ամերիկայի մահվանը», — հայտարարել է Իսրայելի վարչապետ Բենիամին Նեթանյահուն։