Իրանը պատրաստել է ծրագիր Խամենեիի մահվան դեպքում – ԶԼՄ-ներ

Իրանի Գերագույն առաջնորդը հանձնարարել է մշակել գործողությունների ծրագիր այն դեպքի համար, եթե հնարավոր բախման ժամանակ ԱՄՆ-ի հետ նա սպանվի, հաղորդում են լրատվամիջոցները։

Իրանի Գերագույն առաջնորդ Ալի Խամենեին հրամայել է սկսել նախապատրաստական աշխատանքներ այն սցենարի համար, եթե ինքը սպանվի։ Այս մասին գրում է The New York Times-ը՝ հղում անելով աղբյուրներին։

Բացի այդ, Խամենեին հանձնարարել է պատրաստվել նաև այն հնարավորությանը, որ ԱՄՆ-ի հետ ռազմական հակամարտության դեպքում Իրանում կառավարման համակարգում խափանումներ առաջանան։

Աղբյուրի համաձայն՝ նախապատրաստական աշխատանքները հանձնվել են Խամենեիի վստահված անձանց նեղ շրջանակին, ինչպես նաև Իսլամական հեղափոխության պահապանների կորպուսի (ԻՀՊԿ / ԿՍԻՐ) ներկայացուցիչներին։

Բոլոր առանցքային որոշումները վստահվել են նախկին խորհրդարանի նախագահ և Ազգային անվտանգության բարձրագույն խորհրդի քարտուղար Ալի Լարիջանիին։ The New York Times-ի տվյալներով՝ վերջին շրջանում նրա ազդեցությունն էականորեն աճել է։ Ներկայում նա մասնակցում է ԱՄՆ-ի հետ բանակցություններին՝ Իրանի միջուկային ծրագրի շուրջ, վերահսկում է ներքին անվտանգության հարցերը և կապեր է պահպանում դաշնակիցների հետ։

Նշվում է նաև, որ Իրանի Գերագույն առաջնորդը հանձնարարել է ընտրել մինչև չորս հնարավոր փոխարինող՝ երկրի ներսում իրավիճակի ապակայունացման դեպքում, եթե ինքը զոհվի։

Ըստ տեղեկությունների՝ Խամենեին արդեն սահմանել է երեք հնարավոր իրավահաջորդների, սակայն նրանց անունները դեռևս չեն հրապարակվում։ Միաժամանակ աղբյուրը նշել է, որ Լարիջանին նրանց թվում չէ։