Իրանի զինված ուժերից ԱՄՆ-ին նախազգուշացրել են զերծ մնալ ռազմական գործողություններից

Ժնևում Իրանի և ԱՄՆ-ի միջև անուղղակի բանակցություններից հետո Իրանի զինված ուժերը զգուշացրել են Միացյալ Նահանգներին զերծ մնալ ռազմական գործողություններից։ Այս մասին հաղորդում է «ՌԻԱ Նովոստի» գործակալությունը։

Իրանի բարձրաստիճան զինվորականը նաև ընդգծել է, որ Իրանի զինված ուժերը հետևում են ԱՄՆ ռազմական տեղաշարժերին, և որ ցանկացած բախման դեպքում «տարածաշրջանում ԱՄՆ բոլոր աղբյուրներն ու շահերը կլինեն իրանական ուժերի հասանելիության սահմաններում»։

Փետրվարի 26-ին Ժնևում Օմանի միջնորդությամբ տեղի է ունեցել ԱՄՆ-ի և Իրանի միջև բանակցությունների երրորդ փուլը: Բանակցություններից հետո Իրանի արտաքին գործերի նախարար Աբբաս Արաղչին հայտարարել է, որ կողմերը կարող են նոր հանդիպում անցկացնել մեկ շաբաթվա ընթացքում:

Նա հայտարարել է, որ Իրանի և ԱՄՆ-ի պատվիրակությունները տեխնիկական խորհրդակցություններ կսկսեն մարտի 2-ից, Վիեննայում Ատոմային էներգիայի միջազգային գործակալությունում:

Արաղչին նաև հայտարարել է, որ փետրվարի 26-ի հանդիպումը մինչ օրս ամենաինտենսիվն էր, և բանակցություններում առաջընթաց է գրանցվել։

«Ցանկացած անխոհեմ քայլ կբորբոքի կրակ, որը կընդգրկի ամբողջ տարածաշրջանը», – ասել է Իրանի զինված ուժերի խոսնակ Աբոլֆազլ Շեքարչին՝ զգուշացնելով «պատմական» պատասխանի մասին։

Շեքարչին, որի խոսքերը մեջբերել է Իրանի պետական հեռարձակող ընկերությունը, արձագանքել է ԱՄՆ նախագահ Դոնալդ Թրամփի վերջին հայտարարություններին։ Բանակցություններից առաջ Թրամփը կոչ էր արել Թեհրանին համաձայնության գալ՝ սպառնալով, որ հակառակ դեպքում վատ կլինի։