Հայաստանը TRIPP-ի շրջանակում կպահպանի սահմանի և մաքսային վերահսկողության ամբողջական իրավասությունը. Միրզոյան
ԵՐԵՎԱՆ, հուլիսի 16, «Նովոստի-Արմենիա»։ Հայաստանը «Միջազգային խաղաղության և բարգավաճման համար Թրամփի երթուղի» (TRIPP) նախագծի իրականացման շրջանակում կպահպանի պետական սահմանի և մաքսային ընթացակարգերի նկատմամբ ամբողջական վերահսկողությունը։ Այս մասին հինգշաբթի հայտարարել է Հայաստանի Հանրապետության արտաքին գործերի նախարար Արարատ Միրզոյանը։
Հայաստանի կառավարությունը հինգշաբթի օրը կայացած նիստում հավանություն է տվել ԱՄՆ-ի հետ TRIPP նախագծի շրջանակում ռազմավարական համագործակցության վերաբերյալ շրջանակային համաձայնագրի վավերացման մասին օրենքի նախագծին։
«TRIPP նախագծի շրջանակում Հայաստանը կպահպանի պետական սահմանի կառավարման, սահմանային հսկողության և մաքսային վարչարարության, ներառյալ Հայաստանի Հանրապետության տարածքում իրականացվող բոլոր մաքսային ընթացակարգերի նկատմամբ ամբողջական ինքնիշխանությունն ու իրավազորությունը», — հայտարարել է Միրզոյանը։
Նրա խոսքով՝ գործընթացի վերջնական փաստաթղթային ձևակերպման համար անհրաժեշտ է համաձայնեցնել ևս երկու փաստաթուղթ՝ բաժնետերերի համաձայնագիրը և TRIPP Development Company-ի կանոնադրությունը։
«Ներկայումս աշխատանքներ են տարվում այդ փաստաթղթերի շուրջ։ Համաձայնագիրը ամրագրում է Հայաստանի և ԱՄՆ-ի մտադրությունը՝ նպաստելու Հարավային Կովկասում խաղաղության ամրապնդմանը՝ տրանսպորտային ենթակառուցվածքների, տարածաշրջանային և համաշխարհային առևտրի զարգացման միջոցով», — նշել է նախարարը։
Միրզոյանը հայտնել է, որ Հայաստանը և ԱՄՆ-ն կստեղծեն TRIPP Development Company ընկերությունը, որը հնարավորություն կունենա Հայաստանի Հանրապետության տարածքում հիմնադրել մասնագիտացված ընկերություններ՝ առանձին նախագծերի իրականացման նպատակով, ինչպես նաև ներգրավել գործընկերների։
Նրա խոսքով՝ ընկերությունը համապատասխան տարածքներում կստանա հողամասերի օգտագործման և կառուցապատման իրավունք՝ սկզբնական փուլում 49 տարի ժամկետով։
«Այդ ժամանակահատվածում ընկերության բաժնետոմսերի 74 տոկոսը կպատկանի ԱՄՆ-ին, իսկ 26 տոկոսը՝ Հայաստանին։ 49 տարվա ավարտից հետո կողմերը փոխադարձ համաձայնությամբ կարող են համագործակցությունը երկարաձգել ևս 50 տարով։ Երկարաձգման դեպքում Հայաստանի բաժնեմասը պետք է կազմի 49 տոկոս», — ասել է Միրզոյանը։
TRIPP նախագծի մասին
ՀՀ արտաքին գործերի նախարարությունը հունիսի 4-ին հայտնել էր, որ Հայաստանը և ԱՄՆ-ն ստորագրել են TRIPP նախագծի վերաբերյալ շրջանակային համաձայնագիրը, որը նախաստորագրվել էր մայիսի 26-ին՝ ԱՄՆ պետքարտուղարի Երևան կատարած այցի շրջանակում։
Դրանից մեկ օր առաջ ԱՄՆ Միջազգային զարգացման ֆինանսական կորպորացիայի (DFC) տնօրենների խորհուրդը հավանություն էր տվել TRIPP Development Company համատեղ ընկերության ստեղծմանը, որը հանդիսանում է ԱՄՆ-ի և Հայաստանի համատեղ ձեռնարկություն և ընդգրկված է DFC-ի 2,5 միլիարդ դոլար արժողությամբ նոր ռազմավարական ներդրումային փաթեթի չորս նախագծերից մեկում։
TRIPP Development Company-ի նպատակն է աջակցել Կովկասի տարածաշրջանում առևտրի, տրանսպորտի և տնտեսական զարգացմանը, ինչպես նաև ընդլայնել միջազգային, միջպետական և ներպետական տրանսպորտային կապակցվածությունը։
Ավելի վաղ Հայաստանի իշխանությունները հայտարարել էին, որ TRIPP Development Company-ն նախագծի իրականացման առաջնային իրավունքը կստանա 49 տարի ժամկետով։ Նախատեսվում է համատեղ ձեռնարկության բաժնետոմսերի 74 տոկոսն առաջարկել ԱՄՆ-ին, իսկ 26 տոկոսը պահպանել Հայաստանի վերահսկողության ներքո։ Եթե համաձայնագիրը երկարաձգվի ևս 50 տարով, բաժնեմասերի հարաբերակցությունը նախատեսվում է փոխել։