Հայաստանը Սահմանադրությունը փոխելու պարտավորություն իր վրա չի վերցրել
Մենք հավատում ենք և լուրջ ջանքեր ենք գործադրում, որպեսզի տեղահանված անձինք կարողանան լիովին ինտեգրվել և շարունակել իրենց կյանքը Հայաստանում։ Այս մասին հայտարարել է ԱԳ նախարար Արարատ Միրզոյանը ԵԱՀԿ գործող նախագահ, Ֆինլանդիայի ԱԳ նախարար Էլինա Վալտոնենի հետ համատեղ մամուլի ասուլիսում։
Պատասխանելով Բաքվի կողմից խաղաղության համաձայնագրի ստորագրման պայմանների մասին հարցին՝ նախարարը նշել է, որ դրանք հենց լրագրողն է թվարկել՝ ԵԱՀԿ Մինսկի խմբի լուծարում և սահմանադրական փոփոխություններ։
«Ինչպես ճիշտ նշեցիք, Մինսկի խմբի հարցը, ըստ էության, լուծված է. կա քաղաքական որոշում, և տեխնիկական հարցերը կլուծվեն մինչև դեկտեմբեր։ Սահմանադրության վերաբերյալ նման հարց օրակարգում չկա», – ասել է Միրզոյանը։
Նա ընդգծել է, որ Սահմանադրության փոփոխությունը կամ նորի ընդունումը բացառապես ներքաղաքական հարց է, և դա պետք է որոշի Հայաստանի ժողովուրդը։
«Հայաստանը երբեք նման պարտավորություններ չի ստանձնել։ Սա ներքին հարց է։ Այո՛, Ադրբեջանը շարունակում է դա կապել որպես պայման, բայց մենք չենք ընդունում այդ կապը», – նշել է նախարարը։