Հայաստանի ֆուտբոլի ընտրանին Երևանում հաղթեց Իռլանդիային
Ֆուտբոլի աշխարհի առաջնության ընտրական փուլի երկրորդ տուրում Հայաստանի հավաքականը Երևանում ընդունեց Իռլանդիայի ընտրանուն։
Վազգեն Սարգսյանի անվան «Հանրապետական» մարզադաշտում տեղի ունեցած հանդիպման սկզբում հյուրերը կարող էին բացել հաշիվը, սակայն Էրիկ Փիլոյանը գնդակը դուրս բերեց դարպասի գծից։ Հայաստանի հավաքականն էլ ուներ մի քանի վտանգավոր պահեր, բայց դրանք չիրացրեց։
Առաջին կեսի ավելացված րոպեին նշանակված 11 մետրանոցը անթերի իրացրեց Էդուարդ Սպերցյանը՝ իր կարիերայում երկրորդ անգամ խփելով Իռլանդիային։ Երկրորդ կեսի 50-րդ րոպեին Հրանտ Լեոն-Ռանոսը արագ հակագրոհից հետո կրկնապատկեց առավելությունը։ Սակայն արդեն 56-րդ րոպեին Իռլանդիայի կազմում դիպուկ հարվածով աչքի ընկավ Էվան Ֆերգյուսոնը՝ կրճատելով հաշվի տարբերությունը։
Սերոբյանը կարողացավ երրորդ գնդակը ուղարկել մրցակցի դարպաս, բայց այն չհաշվվեց՝ խաղից դուրսի համար։
Հանդիպումն ավարտվեց Հայաստանի հաղթանակով՝ 2:1։ Հաջորդ խաղը Հայաստանի հավաքականը կանցկացնի հոկտեմբերի 11-ին՝ արտագնա հանդիպում Հունգարիայի հետ։