Էրդողանը կարծում է՝ Հայաստանն «ավելի ճկուն է» «Զանգեզուրի միջանցքի» հարցում
Ազատություն ռ/կ
Չնայած Հայաստանն ի սկզբանե դեմ էր «Զանգեզուրի միջանցքին», այն ավելի ճկուն մոտեցում է ցուցաբերում տնտեսական ինտեգրմանը մասնակցելու հարցում, հայտարարել է Թուրքիայի նախագահ Ռեջեփ Էրդողանը՝ առանց փակագծեր բացելու։
Բաքուն Հայաստանից ճանապարհ՝ «Զանգեզուրի միջանցք» է պահանջում, որն Ադրբեջանը կկապի Նախիջևանին ու կլինի առանց մաքսային հսկողության ու անխոչընդոտ: Երևանը պնդում է, որ այդ ճանապարհները պետք է գործեն երկրների ինքնիշխանության ներքո՝ մերժելով միջանցքային տրամաբանությունը:
Ըստ «Անադոլու» պետական լրատվական գործակալության՝ Թուրքիայի առաջնորդը պնդել է նաև, որ «Զանգեզուրի միջանցքը» նոր հնարավորություններ կբերի ոչ միայն Ադրբեջանի, այլև ամբողջ տարածաշրջանի համար:
«Մենք այս գիծը դիտարկում ենք որպես աշխարհատնտեսական հեղափոխության մի մաս»,- ասել է Էրդողանը և հույս հայտնել, որ հայ-ադրբեջանական խաղաղության պայմանագրի ստորագրման շնորհիվ «նոր և պատմական հնարավորությունների պատուհանների» բացման ականատեսը կդառնան։