Թիմերին ձեռք է տալիս միմիայն հաղթանակը:

Հայաստանի ֆուտբոլի հավաքականը 2026թ աշխարհի առաջնության եվրոպական գոտու ընտրական մրցաշարի F խմբի չորրորդ տուրում այսօր Դուբլինի «Ավիվա» ստադիոնում կմրցի Իռլանդիայի ընտրանու հետ։

Սա Հայաստանի հավաքականի երրորդ այցն է Իռլանդիայի մայրաքաղաք: Նախորդ երկու հանդիպումները սկզբունքային նշանակություն են ունեցել կողմերի համար: 2011 թվականի խաղում թիմերը վիճարկում էին Եվրո-2012-ի ուղեգիր: Հայաստանին անպայման պետք էր հաղթանակ անցումային 2-րդ տեղը գրավելու համար: Ավաղ, սկանդալային մրցավարության պայմաններում անցած խաղն ավարտվել է տանտերերի հաղթանակով՝ 2:1:

2022 թվականին Դուբլինում կայացած թիմերի երկրորդ խաղում արդեն որոշվում էր Ազգերի լիգայի Բ գոտում մնալ-չմնալու հարցը: Մեր թիմին կրկին ձեռնտու էր միմիայն հաղթանակը: Այդ անգամ մեր ֆուտբոլիստները կամային բարձր հատկանիշներ են ցուցաբերում և 0:2 հաշվով պարտվելիս կարողանում են վերականգնել հավասարակշռությունը: Սակայն, հանդիպման վերջին րոպեին տանտերերը 11մ իրավունքն են ստանում և դարձյալ հաղթանակ կորզում՝ 3:2:

Այսօր Հայաստանի և Իռլանդիայի հավաքականները պայքար են մղում 2026թ աշխարհի առաջնության ուղեգրի համար: Այս անգամ հաղթանակն ավելի շատ անհրաժեշտ է իռլանդացիներին, քանի որ նրանք վաստակել են ընդամենը 1 միավոր և խմբում զբաղեցնում են վերջին տեղը: Հայաստանն իր ակտիվում ունի 3 միավոր և 2-րդ տեղում ընթացող Հունգարիայից ետ է մնում մեկ բալով: Այնպես որ, մեր ընտրանուն այսօր դարձյալ ֆուտբոլային ճակատամարտ է սպասվում Դուբլինում:

Նշենք, որ Իռլանդիայի և Հայաստանի հավաքականներն ընդհանուր առմամբ իրար հետ հանդիպել են 5 անգամ: Երկու խաղերում հաղթանակ է տարել մեր թիմը, իսկ երեքում հաջողությունն ուղեկցել է իռլանդացիներին: Ի դեպ, կողմերից ոչ մեկին չի հաջողվել հաղթել երկու և ավելի գնդակի առավելությամբ:   

Բուքմեյքերները Իռլանդիա – Հայաստան խաղի ֆավորիտ են համարում տանտերերին՝ 1,57 գործակից: Հայաստանի հավաքականի հաղթանակը նրանք գնահատել են 6,00-ից մինչև 6,48 գործակից:

Իռլանդիա – Հայաստան հանդիպումը կսկսի Երևանի ժամանակով ժամը 22-45-ին: