Թիմերին այժմ բաժանում է մեկ միավոր:

Հայաստանի ֆուտբոլի հավաքականն աշխարհի 2026թ առաջնության ընտրական փուլի շրջանակում այսօր կընդունի Իռլանդիայի ընտրանուն:

Մեկնարկային խաղում մեր թիմը սեփական դաշտում 0:5 հաշվով պարտվել է Պորտուգալիայի հավաքականին, իսկ իռլանդացիներն իրենց հարկի տակ մարտական ոչ-ոքի են խաղացել Հունգարիայի հետ: Այդ իսկ պատճառով այսօրվա հանդիպումը կարևոր նշանակություն ունի կողմերի համար:

Հայաստանի և Իռլանդիայի հավաքականները ընտրական նույն խմբում հայտնվել են երկու անգամ: 2012թ Եվրոպայի առաջնության ընտրական մրցաշարում իռլանդացիները երկու խաղում էլ հաղթել են մեր թիմին՝ 1:0, 2:1, ընդ որում Դուբլինում կայացած հանդիպումը սկանդալային ստացվեց, քանի որ մրցավարն արդեն առաջին խաղակեսում դաշտից հեռացնում է մեր դարպասապահ Ռոման Բերեզովսկուն:

Երկրորդ անգամ երկու երկրների հավաքականները նույն խմբում հայտնվել են 2023թ Ազգերի լիգայի մրցաշարում: Հունիսի 4-ին Երևանում կայացած խաղում Հայաստանի ընտրանին Էդուարդ Սպերցյանի խփած միակ գոլի հաշվին հաղթանակ է տոնել, իսկ սեպտեմբերի 27-ին Դուբլինում մերոնք 2:3 հաշվով ցավալի պարտություն են կրել, քանի որ վերջին գոլը բաց են թողել խաղի վերջին րոպեին: Այդպիսով, այսօր կկայանա երկու երկրների հավաքական թիմերի 5-րդ դիմակայությունը, այդ թվում երրորդը Երևանում:

Հայաստան – Իռլանդիա խաղը կսպասարկի վրացական մրցավարական խումբը, Գոգա Կիկաչեիշվիլիի գլխավորությամբ: Հանդիպումը կմեկնարկի Երևանի ժամանակով ժամը 20:00-ին: Խաղի բոլոր տոմսերը վաճառված են: