Աշխարհում շուրջ 800 միլիոն մարդ դեռ ապրում է ծայրահեղ աղքատության մեջ․ Գուտերեշ
Աշխարհում շուրջ 800 միլիոն մարդ շարունակում է ապրել ծայրահեղ աղքատության պայմաններում։ Այս մասին նշվում է ՄԱԿ-ի գլխավոր քարտուղար Անտոնիու Գուտերեշի հայտարարության մեջ, որը հղված էր Պեկինում մեկնարկած Աղքատության կրճատման և զարգացման գլոբալ համաժողովի մասնակիցներին։
«Մոտ 800 միլիոն մարդ՝ կանայք, տղամարդիկ և երեխաներ, դեռևս ապրում են ծայրահեղ աղքատության մեջ՝ սկսած հեռավոր գյուղական բնակավայրերից մինչև խիտ բնակեցված քաղաքային թաղամասեր»,- ասվում է ուղերձում, որը համաժողովի ընթացքում ընթերցել է Չինաստանում ՄԱԿ-ի մշտական համակարգող Սթիվեն Ջեքսոնը։
Գուտերեշի գնահատմամբ՝ այդ մարդկանց վիճակն առավել ծանր է դառնում զինված հակամարտությունների, կլիմայական փոփոխությունների, աճող անհավասարության և պարտքային բեռի հետևանքով։ Նա կառավարություններին կոչ է արել ներդրումներ ուղղել արժանապատիվ աշխատանքի ապահովման, որակյալ կրթության և առողջապահության զարգացման, գյուղական համայնքների կայուն առաջընթացի, ինչպես նաև համընդհանուր սոցիալական պաշտպանության համակարգերի ձևավորման ուղղությամբ։
ՄԱԿ-ի գլխավոր քարտուղարը նաև ընդգծել է համաշխարհային ֆինանսական համակարգի բարեփոխման անհրաժեշտությունը՝ այն առավել արդար և արդյունավետ դարձնելու նպատակով։