Արարատ լեռան մոտակայքում Նոյի տապանի ներսում թաքնված թունելներ են հայտնաբերվել
Հնագիտական աշխարհում նոր բացահայտում է արվել, որը կարող է լույս սփռել մարդկության պատմության ամենամեծ առեղծվածներից մեկի՝ Նոյի տապանի վրա։ Ամերիկացի հետազոտողների մի խումբ, որն աշխատում է Արարատ լեռան մոտ գտնվող Դուրուպինար վայրում, հայտնաբերել է թաքնված թունելների ապացույցներ, որոնք համապատասխանում են Նոյի տապանի աստվածաշնչյան նկարագրությանը։ Այս մասին հաղորդում է Daily Mail-ը։
Noah's Ark Scans-ի անկախ հետազոտող Էնդրյու Ջոնսը, օգտագործելով գետնափոր ռադար (GPR) տեխնոլոգիան, հայտնաբերել է «միջանցքների» ցանց, որը միանում է կենտրոնական խցիկին, որը նա անվանել է նախասրահ։ Ջոնսը այս հայտնագործությունը կապել է տապանի աստվածաշնչյան նկարագրության հետ, որը ցույց է տալիս, որ նավն ուներ երեք ներքին մակարդակ՝ Նոյին, նրա ընտանիքին և կենդանիներին տեղավորելու համար։ «Աստված ասաց Նոյին բերել կենդանիներին։ Եվ այդ կենդանիները, Նոյի և նրա ընտանիքի հետ միասին, պետք է այնտեղ լինեին», - ասել է Ջոնսը GB News-ին՝ հավելելով, որ «հետաքրքիրն այն է, որ այս դատարկությունները պատահականորեն չեն դասավորված ստորգետնյա տարածքում՝ դրանք կազմում են առանձին կառուցվածք»։
Հետազոտողը նաև նշել է, որ ջերմային սկանավորման տեխնոլոգիայի՝ ինֆրակարմիր ջերմագրության (IRT) միջոցով հետագա ուսումնասիրությունները հաստատել են հողի խորքում թաղված նավաձև կորպուսի առկայությունը։ Դուրուպինար վայրը, որը գտնվում է Արարատից ընդամենը 18 մղոն հարավ, հայտնի դարձավ 1948 թվականին, երբ ուժեղ անձրևներն ու երկրաշարժերը բացահայտեցին մի խորհրդավոր կազմավորում։ Աստվածաշունչն ասում է, որ տապանը կանգ է առել «Արարարատի լեռների» վրա՝ 150-օրյա ջրհեղեղից հետո։ Հատկանշական է, որ կազմավորման չափերը մոտ են Աստվածաշնչյան չափումներին՝ մոտավորապես 157 մետր երկարություն, 26 մետր լայնություն և 16 մետր բարձրություն։
2024 թվականին Ջոնսը հայտնել է, որ իր թիմը հավաքել է «նավի» ներսից և դրսից հողի 88 նմուշ։ Փորձարկումները ցույց են տվել կալիումի չափազանց բարձր մակարդակ, որը բնորոշ է փայտի մեծ քանակությամբ քայքայմանը։ Չնայած դրան, Noah's Ark Scans-ի ներկայացուցիչները X սոցիալական ցանցում բացատրում են, որ «չափազանց ցուրտ կլիմայի պատճառով, տապանի շատ մասեր դեռևս անվնաս են և բրածո վիճակում։ Այն տարվա գրեթե վեց ամիս մնում է լիովին սառած»։ Մինչև 6 մետր խորության վրա հայտնաբերվել են անկյունային կառույցներ, որոնք էլ ավելի են ամրապնդում այս վայրի կարևորությունը։