Ալեն Սիմոնյանի հրաժեշտի նիստը. 8-րդ գումարման ԱԺ-ն ավարտեց աշխատանքը
8-րդ գումարման Ազգային ժողովի վերջին նիստի գլխավոր իրադարձությունը խորհրդարանի խոսնակին հրաժեշտ տալն էր: Գլխավոր հեռացող Ալեն Սիմոնյանն ամբիոնից վերջին անգամ դիմեց թիմակիցներին: Ընդդիմադիրները դարձյալ բացակա էին:
«Եթե աշխատանքիս ընթացքում ինչ-որ մեկի նկատմամբ անարդար եմ եղել, թող ներողամիտ լինեն: Դուք գիտեք, որ ես բոլորիդ սիրում եմ ու ինչքան կարևոր եք բոլորդ իմ համար»,- իր ելույթում ասաց Ալեն Սիմոնյանը:
Մինչ Ալեն Սիմոնյանը կմոտենար ամբիոնին, նրան այդ պաշտոնում հաջորդող Ռուբեն Ռուբինյանը Սիմոնյանի աշխատանքը որակեց «փայլուն», իր ելույթում Ռուբինյանն ընդգծեց.
«Այս տարիների ընթացքում Հայաստանն անցել է բազմաթիվ բարդությունների, դժվարությունների միջով, բայց մենք բոլորս՝ ՀՀ վարչապետի գլխավորությամբ և մենք էլ Ազգային ժողովում պարոն Սիմոնյանի գլխավորությամբ հասել ենք մեր ամենակարևոր խոստման կատարմանը՝ խաղաղությանը, և ես ուզում եմ շնորհակալություն հայտնել պարոն Սիմոնյանին մեր քաղաքական թիմը առաջնորդելու համար»:
ՔՊ-ականները հոտնկայս ծափահարեցին: Ծափերին ու ընդհանուր տրամադրությանը, սակայն, չմիացավ պատգամավոր Հայկ Սարգսյանը. նա այդպես էլ մնաց նստած։ Սիմոնյանի և Սարգսյանի հարաբերությունները լարված են, երկուսն էլ դա չեն թաքցնում:
«Քաղաքացիական պայմանագրի» 20 հոգանոց վարչությունից, ըստ մամուլի, Սիմոնյանի թեկնածությանը կողմ էին քվեարկել 5 հոգի: Սակայն այսօր նիստերի դահլիճում նրա չընտրվելու պատճառները շրջանցվեցին, հեռացող խոսնակին ուղղում էին միայն դրվատանքի խոսքեր:
«Իմ վերջին ելույթով այս ամբիոնից ես ուզում եմ շնորհակալություն հայտնել ևս մեկ անգամ Ազգային ժողովի նախագահ պարոն Սիմոնյանին՝ իր կատարած շատ կարևոր և վճռական աշխատանքի համար, և ես ուզում եմ նաև արձանագրել, որ մեր թեկնածուն և մեր առաջադրած թեկնածությունն իսկապես հաջողված էր»,- ասաց ՔՊ պատգամավոր Հայկ Կոնջորյանը: