Ադրբեջանը քրեական գործ է հարուցել թուրք սյունակագիր Ջելալ Չիֆթչիի նկատմամբ՝ իշխանությունը բռնի ուժով զավթելու և կրոնական ատելություն հրահրելու ենթադրյալ կոչերի կապակցությամբ և միջազգային հետախուզում հայտարարել նրա նկատմամբ, հայտնում է OC Media-ն։
Գործը հարուցվել է Ադրբեջանի և Թուրքիայի միջև լարվածության ֆոնին, որն սկսվել էր այն բանից հետո, երբ թուրք պաշտոնյաներն ու քաղաքական գործիչները հրապարակավ քննադատել էին ադրբեջանական դպրոցներում համազգեստի վերաբերյալ Բաքվի նոր որոշման առնչությամբ, որը փաստացի արգելում է հիջաբ կրել դպրոցներում և բողոքի ակցիաների պատճառ էր դարձել երկրում։
Գլխավոր դատախազությունը հայտարարել է, որ գործը հարուցվել է սոցցանցերում կրոնական արմատականություն, հեղաշրջում և Ադրբեջանի սահմանադրական կարգի բռնի փոփոխություն քարոզող գրառումներից հետո։ Ըստ գլխավոր դատախազության՝ թուրքական «Շանլիուրֆա Օլայ» թերթի սյունակագիր Ջելալ Չիֆթչիին այս գործով մեղադրանք է առաջադրվել։
Դատախազության մամուլի ծառայության տարածած հայտարարության համաձայն՝ հետաքննությունը սկսվել է տարբեր անձանց, այդ թվում՝ Թուրքիայի 51-ամյա քաղաքացի Չիֆթչիի կողմից սոցիալական ցանցերում տարածվող նյութերի վերաբերյալ հաղորդագրություններից հետո։ Նյութը, ենթադրաբար, կոչ է անում բռնի ուժով զավթել իշխանությունն Ադրբեջանում և բռնության միջոցով հրահրում էր կրոնական ատելություն և թշնամանք։
Ի՞նչ է արել սյունակագիրը
Թեև հայտարարությունում չի նշվում, թե կոնկրետ ինչ է ասել ինքը՝ Չիֆթչին, սակայն, ըստ լրատվամիջոցի, ակնհայտորեն, խոսքը վերաբերում է նրա տարածած տեսանյութին։ Արհեստական բանականությամբ գեներացված այդ տեսանյութում գիշերները գետնին են գցում նախագահի Իլհամ Ալիևի լուսանկարը։
Չիֆթչին նախկինում քննադատել է Ալիևին դպրոցներում հիջաբ կրելու արգելքի համար։
Գլխավոր դատախազությունը հայտարարել է, որ իր հետաքննության արդյունքում բացահայտվել են կրոնական արմատականությունը խթանող բովանդակության տարածման բազմակի դեպքեր Ադրբեջանի նախարարների կաբինետի 2026-ի սեպտեմբերի 21-ի որոշումից հետո, այդ թվում՝ արհեստական բանականությամբ ստեղծված նյութեր։
Դատախազությունը նաև նշում է տարբեր վերնագրերով հրապարակված բազմակի կոչերի մասին, որոնք ենթադրաբար խրախուսում են հեղաշրջումը, իշխանության բռնի զավթումը, սահմանադրական կարգի փոփոխությունները և կրոնական ատելության ու թշնամանքի հրահրումը բռնության միջոցով։
Հենց այս նյութերի հիման վրա դատախազությունը քրեական գործ է հարուցել հոկտեմբերի 16-ին։ Քննությունը հանձնարարվել է գլխավոր դատախազության քննչական վարչությանը։
Օգնություն Թուրքիայից
Դատախազության մամուլի ծառայությունը հայտնել է, որ Միջազգային իրավական օգնության նպատակով դիմումներ են ուղարկվել Թուրքիայի իրավասու մարմիններին՝ Չիֆթչիի և այլ անձանց վերաբերյալ քննչական գործողություններին աջակցելու համար։ Ըստ հայտարարության՝ նաև լրացուցիչ միջոցներ են ձեռնարկվում միջազգային համագործակցության մեխանիզմների միջոցով։
Գլխավոր դատախազությունը նաև նշում է, որ շարունակվում են քննչական միջոցառումները՝ նյութի բովանդակությունը, դրա պատրաստման և տարածման հանգամանքները, ինչպես նաև այլ համապատասխան փաստեր պարզելու համար՝ նախքան իրավական հետևանքները որոշելը և օրենքին համապատասխան որոշումներ կայացնելը։
Ադրբեջանի Գլխավոր դատախազությունը նաև կոչ է արել հանրությանը զերծ մնալ կրոնական ատելություն և թշնամանք քարոզող բովանդակություն տարածելուց, պատասխանատու կերպով օգտագործել սոցիալական ցանցերը և պահպանել օրենքը՝ նշելով կրոնական հանդուրժողականության, փոխադարձ հարգանքի և սոցիալական համերաշխության պաշտպանության անհրաժեշտությունը։
Չիֆթչին ներողություն է խնդրել
Ուրբաթ երեկոյան Չիֆթչին հրապարակավ ներողություն է խնդրել՝ ասելով, որ «մտադրություն չի ունեցել կրոնական ատելություն, թշնամանք կամ խտրականություն սերմանելու» և չի ցանկացել, որ իր գրառումը մեկնաբանվի որպես հեղաշրջման կոչ։
«Ես չեմ ընդունում այս առնչությամբ ինձ առաջադրված մեղադրանքները։ Ադրբեջանը եղբայրական պետություն է, ադրբեջանական ժողովուրդը մեր եղբայրներն են։ Ես լիակատար հարգանք ունեմ Ադրբեջանի Հանրապետության անկախության, ինքնիշխանության, տարածքային ամբողջականության և սահմանադրական կարգի նկատմամբ»,- նշել է նա։
Այնուամենայնիվ, Չիֆթչին վերահաստատել է իր համոզմունքը, որ «մարդիկ չպետք է մեկուսացվեն իրենց համոզմունքների կամ հագուստի ընտրության պատճառով», նկատի ունենալով դպրոցներում հիջաբ կրելու արգելքը։
ՄԵԿՆԱԲԱՆՈՒԹՅՈՒՆՆԵՐ
0