Ադրբեջանից Հայաստան՝ 6.4 մլն դոլարի նավթամթերք, Հայաստանից Ադրբեջան՝ 0 դոլարի ապրանք
Այս տարվա առաջին եռամսյակում Հայաստանն Ադրբեջանից շուրջ 6.4 միլիոն դոլարի նավթամթերք է ներկրել, սակայն հարևան երկիր չի արտահանել գեթ 1 դոլարի ապրանք: Չնայած դեռ ամիսներ առաջ պաշտոնյաների արած հայտարարություններին, թե շուտով հայկական ապրանքներն էլ ադրբեջանական շուկա կհասնեն, Պետական եկամուտների կոմիտեի հրապարակած պաշտոնական վիճակագրության համաձայն՝ դեպի Ադրբեջան տարվա առաջին եռամսյակում ընդհանրապես արտահանում չի եղել:
«Ադրբեջանից դեպի Հայաստան ներմուծում կա, հույս ունեմ՝ Հայաստանից դեպի Ադրբեջան էլ արտահանում կլինի». - վարչապետ Նիկոլ Փաշինյանի այս հայտարարությունից անցել է արդեն շուրջ 7 ամիս, այս ընթացքում Կառավարությունը տեղեկացրեց, թե կողմերը ցանկեր են փոխանակել, թե ինչպիսի ապրանքներով են հետաքրքրված: Աղվերանի հյուրանոցներից մեկում հայկական բիզնեսի ներկայացուցիչները հանդիպեցին Ադրբեջանի փոխվարչապետի գլխավորած պատվիրակության հետ, սակայն այդպես էլ արտահանում կազմակերպել չի հաջողվում, երկու երկրների միջև առևտրային սալդոն 100 տոկոսով հարևան երկրի օգտին է:
«Կա այդպիսի ապրանք, կոնկրետ հայտ եղել է, և կոնկրետ հետաքրքրություն է եղել փայլաթիթեղի նկատմամբ, և կոնկրետ կոդի, փայլաթիթեղի համար ադրբեջանական կողմը խնդրել է կոնկրետ գին, և մեր արտադրողը տվել է: Այսինքն՝ ամենաերկար բանակցությունը, որ գնացել է, այսինքն՝ ցանկերը փոխանակվելուց հետո, սա եղել է, որ այ էսինչ հաստության փայլաթիթեղը մեզ հետաքրքրում է», - հայտարարում էր Հայաստանի էկոնոմիկայի նախարարը:
Ոչ միայն Գևորգ Պապոյանն էր ամիսներ առաջ այսպիսի հայտարարություններ անում, այլև արտաքին գերատեսչությունն էր Աղվերանում կայացած հանդիպումից հետո տեղեկացրել, թե կողմերի գործարարները քննարկել են փոխադարձ առևտրի վերաբերյալ հարցեր:
Արդեն հասանելի են դեպի Հայաստան մատակարարումների և Հայաստանից արտահանումների ավելի հստակ տվյալները՝ ո՞ր ապրանքից ինչքա՞ն է Հայաստան մտել, ո՞ր երկրից, կոնկրետ ապրանք որքա՞ն են արտահանել այս կամ այն երկիր:
Թեև Պետական եկամուտների կոմիտեի հրապարակած վիճակագրությունը չի արտացոլում նախընտրական շրջանից սկսած Ռուսաստանի տնտեսական սահմանափակումները, սակայն երևում է՝ Ռուսաստանի հետ առևտրաշրջանառության կառուցվածքում որոշ փոփոխություններ են եղել:
Օրինակ՝ այս տարվա առաջին եռամսյակում Հայաստանը Ռուսաստանից շատ ավելի քիչ նավթամթերք է ներկրել, քան անցյալ տարվա նույն ժամանակահատվածում. ծավալն ավելի քան երեք անգամ փոքր է, թեև այն զգալիորեն ավելի մեծ է Ադրբեջանից մատակարարումների ծավալից:
Եթե Հայաստանի իշխանություններին ստացվում է դիվերսիֆիկացնել վառելիքի ներկրումն ու Ռուսաստանի մասնաբաժինը փոքրանում է, ցորենի պարագայում ուղիղ հակառակ պատկերն է. Հայաստանը կախվածություն ունի ռուսական ցորենից ու այս տարվա առաջին եռամսյակում էլ ավելի շատ է ներկրել, քան անցած տարի: Երեք ամսվա ընթացքում շուրջ 20 միլիոն դոլարի ռուսական ցորեն է Հայաստանի շուկա մտել, անցած տարվա նույն ժամանակահատվածում ծավալը 16.5 միլիոն դոլարի չէր հասել:
Պաշտոնական վիճակագրությունն ուղիղ հակասում է էկոնոմիկայի նախարարի խոսքերին, որը նախընտրական շրջանում պնդում էր, թե դեպի Հայաստան մատակարարման աղբյուրները դիվերսիֆիկացված են:
«Հայաստանի Հանրապետությունը ունի անհրաժեշտ պաշարներ, Հայաստանի Հանրապետությունը ունի դիվերսիֆիկացված մատակարարման աղբյուրներ, Հայաստանի Հանրապետությունը ստանում է և կստանա կայուն ցորեն, և այդ մասով մեր քաղաքացիները որևէ մտահոգություն ունենալ չեն կարող, ամեն ինչ կառավարելի է», - վստահեցնում էր Գևորգ Պապոյանը: